我哋日日都會洗頭, 但有冇諗過其實會用咗錯誤嘅方法而不知不覺間慢慢損害緊頭髮和頭皮呢~~? 如果洗頭方法出咗問題, 即使用幾貴嘅洗髮護髮用品都嘥晒啦~! 我上網研究完之後搵到以下資料, 總結咗大部份人常犯嘅7個錯誤, 大家以後洗頭都要多加注意啦!
(1) 無梳頭就直接洗
原來洗頭前要先梳頭！因為梳頭可以令附在頭皮的污垢和灰塵浮於表面，先可以同時洗乾淨頭髮和頭皮！
(2) 洗濕頭髮就即刻落洗頭水
你一洗濕頭髮就直接搽洗頭水？錯錯錯！原來要先用暖水洗頭一分鐘以上，洗走頭上的污垢後，再使用洗頭水，否則啲頭髮會洗唔乾淨架。
(3) 洗頭時用指甲「刮」頭皮
好多女仔都留指甲，其實指甲藏有好多細菌，如果刮損頭皮會容易造成感染，所以最好係用手指頭輕輕力按摩頭皮就足夠啦。
(4) 護髮素搽在髮根 / 頭皮
護髮素只能搽在頭髮及髮尾！因為洗髮時頭髮毛囊會張開，護髮素搽在頭皮的話 會滲入及塞住毛囊，容易造成甩頭髮！！
(5) 唔沖乾淨護髮素
有人誤以為「留低少少護髮素在頭髮有保護功能」，其實錯哂！因為護髮素容易沾上灰塵污垢，反而會堵塞毛囊引致發炎，所以每次洗頭都一定要沖乾淨。
(6) 頭髮濕去睡覺
有人話「頭髮成日吹會旱」，所以頭濕就直接去睡覺… 其實剛剛相反！原來頭髮半濕時會特別脆弱，不可以大力摩擦，如果呢個狀況去睡覺，頭髮同枕頭不停摩擦，會令角質層變薄，反而變得乾旱。
(7) 洗完頭立即去街
如果唔係睡覺，而係洗完頭去街咁又點？一樣唔好！ 因為洗完頭馬上去室外，紫外線會更容易損害頭髮，造成斷髮同開叉。所以如果洗完頭要即刻出街，最好戴番頂帽及擔遮。
