根據水務署資料, 香港人均每日耗用130公升淡水, 當中沖涼同洗衫分別佔咗約四成和一成用水量, 其餘五成則用作煮食和其他用途. 而聯合國建議每人每日應有50至100公升清潔安全食水作日常使用, 所以其實香港人每日用水量都多出唔少㗎!
雖然相比起電費, 香港嘅水費唔算費, 但小數怕長計, 只要喺日常生活唔同地方度度慳一啲, 就好容易積少成多㗎喇!^_^ 而且節約用水 為環保出一分力都係一件好事吖~ 於是我又喺網上搜集咗一啲屋企慳水嘅貼士, 原來只要細心留意生活細節, 改變一下用水嘅小習慣, 就可以慳到水費~ 就等我同大家分享一下啦~ 資料顯示”沐浴”係佔咗約四成嘅用水量, 當然就要喺”浴室”呢方面入手先!
浴室
1) 使用花灑淋浴代替在浴缸浸浴, 並縮短淋浴時間
據統計, 一般嚟講浸浴所用嘅水量係淋浴嘅五倍, 所以盡量減少浸浴式洗澡都可以慳到唔少水! 但同時要留意盡量縮短淋浴時間, 因為如果淋浴超過10分鐘, 用水量便可能會比浸浴更多了! 而且淋浴時要保持良好習慣, 搽沖涼液或番梘時記得要先關掉水龍頭, 唔好白白讓水長流啊~
2) 使用高用水效益的花灑頭和水龍頭, 並留意用水效益標籤
除咗電器常見有關慳電嘅能源效益標籤之外, 水務署喺2009年推出咗「自願參與用水效益標籤計劃」, 呢個計劃採用分級標籤制度, 申請註冊嘅水喉裝置/用水器具須通過測試, 以確定是否符合計劃所訂嘅效能要求, 而符合要求嘅產品就可按照測試所得嘅標稱流量去評定屬於第幾級嘅用水效益級別. 第1級為最慳水, 而第4級則為最嘥水.
消費者可以從「用水效益標籤」上得知有關水喉裝置/用水器具嘅耗水量(公升/分鐘) 同埋用水效益, 留意標籤上嘅水點愈少就代表用水效益愈高㗎!
水滴標示：1滴水代表第1級、2滴代表第2級，如此類推，共分4級。
現時市面上有水務署標籤認證嘅慳水花灑 (如屬第一級用水效益級別嘅花灑) 每分鐘耗水約9公升或以下, 但傳統淋浴花灑每分鐘耗水約15至25公升, 一般按摩花灑每分鐘更耗水達30至40公升, 相比之下, 慳水花灑節水約4成至6成以上, 用咗慳水花灑每年可以慳幾百蚊水費! 慳水花灑售價仲要只係同傳統花灑差不多㗎咋. 但提提大家, 記住喺選購前先留意家中嘅供水水壓, 如果住所喺較高樓層有機會導致水壓唔夠 (例如樓宇嘅最高三樓層無安裝加壓裝置), 咁就要選擇有加壓效能嘅慳水花灑, 以免影響熱水爐運作.
水龍頭同樣都有納入呢個「用水效益標籤計劃」, 我哋選購水龍頭時可以參考產品上面嘅「用水效益標籤」就知道佢係咪能夠有效地節約用水啦! 以非混合式水龍頭為例, 每分鐘出水少於2公升可獲第1級, 即最慳水; 出水2至4公升屬第2級, 4至6公升屬第3級, 6公升以上則屬第4級.
3) 在水龍頭安裝節流器
節流器係一件簡單易用嘅節水裝置, 用來調節水流量並且減低流速, 以減少用水量. 在水龍頭內安裝節流器後, 出水量可節省至少3成! 呢個方法我個人十分建議, 一來節流器售價便宜, 幾十蚊已經買到個3M牌子嘅節流器 (在HKTVmall搵到一款3M牌子節流器仲聲稱可以有效省水達60%) , 如果唔係出名牌子嘅話 二三十蚊已經有交易添! 二來安裝簡單又唔會佔用額外嘅空間~ 而且就算個人嘅用水習慣冇改變, 佢都自然幫你慳到水費!
4) 改動水龍頭去控制出水量
平時我哋開水龍頭嘅時候, 通常唔覺意就會將水龍頭開到好大, 有時可能只係洗一洗手, 根本唔需要咁多嘅水量! 為咗有效控制出水量, 唔會咁浪費用水, 我哋可以用橡筋 (或者其他物件例如絲帶,布帶或繩子) 套入水龍頭開關, 目的係增加阻力, 令水龍頭唔容易開太大, 需要用大流量嘅水時先解開, 咁就自然可以慳到水啦!
例子1:
例子2:
5) 培養良好的水龍頭使用習慣
平時刷牙、洗臉、塗梘液或剃鬚時, 應該先關掉水龍頭, 等有需要用水時才再開水龍頭, 不要貪方便把它長開! 唔好睇小呢個小小嘅舉動, 每個月都慳到唔少水㗎!
根據”香港地球之友”的資料顯示, 洗手時水龍頭一直開著嘅話, 平均有55%嘅時間我們雙手係唔會沾上水的!如果以一般水龍頭平均每分鐘流水10公升嘅程度嚟計算, 每次洗手大約20至30秒, 就代表至少浪費咗1.83公升水, 而這個量再加多一點就已經係我哋每日基本喝水量了! 所以下次洗手記得用以下7個步驟喇!
6) 減低沖廁用水量
由於香港係全球少數以海水(即鹹水)沖廁嘅地方, 所以大部份香港住戶用嘅沖廁水係唔需要交水費嘅, 只需要繳交與水費同時發出帳單中嘅排污費單就可以了. 不過, 現時香港仍有一啲地區要用淡水沖廁, 包括東涌、各區村屋、山頂半山區等, 如果唔想收到昂貴嘅水費單, 可以試試以下三個辦法來控制用水量:
- 選用雙掣式沖廁水箱, 按照需要來以多水或少水沖廁, 及避免不必要地沖廁
- 調整馬桶水箱內嘅浮波螺絲來控制水箱儲水水位, 減少每次冲廁水量
- 放入重物佔水箱空間以控制水箱儲水量, 例如一塊磚頭或裝滿水的膠樽, 減少儲水量代表同時減少沖廁出水量
